Уметницата Искра Димитрова ја изработи корицата на реобјавениот роман „Пустина“ од нејзиниот дедо, Ѓорѓи Абаџиев чие реиздание ќе биде промовирано онлајн вечерва, во 19 часот на фејсбук-страницата на издавачката куќа „Арс Ламина“. За делото на Абаџиев ќе зборува Злата Порчиќ, професорка по компаративна книжевност и македонски јазик во средното училиште „Ѓорѓи Димитров“, а онлајн-разговорот ќе го води Ведран Диздаревиќ, уредник во „Арс Ламина“.
„Пустина“ е објавен во 1961 година, а неодамна беше реобјавен во издание на „Арс Либрис“ (дел од „Арс Ламина – публикации“), во рамките на едицијата „Македонски книжевни класици“, чија цел е реобјавување на класичните дела на македонската книжевност.
„Пустина“ е историско-психолошки роман. Дејството се случува за време на историската 1903 година, раскажано преку заробеништвото на двајцата солунски атентатори Арсо и Глигор, веднаш по еден од нивните страшни бомбашки напади. Движејќи се напред-назад низ времето и мислите на карактерите (главно на Арсо), Абаџиев ни го прикажува внатрешниот живот на двајца исклучителни индивидуалци, загубени во коридорите на историјата, должноста и љубовта.
Ѓорѓи Абаџиев (07.10.1910, Дојран – 02.08.1963, Скопје) е еден од првите македонски раскажувачи и романсиери, особено истакнат по своите романи и раскази втемелени врз македонската историја. Од најмала возраст живеел како емигрант во Грција и во Бугарија. Во 1948 година се вратил во Македонија и во Скопје бил еден од основачите и најактивните соработници на Институтот за национална историја. Од 1949 година е член на Друштвото на писателите на Македонија.
Неговото творештво главно е содржано од раскази и романи со историска предлошка. Ги објавил: „Труд и луѓе“ (уметнички репортажи и раскази, коавторство, 1936), „Изгрев“ (раскази, 1950), „Епопејата на Ножот“ (раскази, 1951), „Последна средба“ (раскази, 1953), „Арамиско гнездо“ (роман, 1954), „Пустина“ (роман, 1961), „Балканските војни и Македонија“ (монографија, 1972). Исто така, тој е еден од сценаристите на филмот „Мис Стон“ (1958). Во 1972 година е објавен избор од неговото творештво во четири тома.
Во рамките на едицијата „Македонски книжевни класици“ реиздаден е и романот „Арамиско гнездо“, чија онлајн-промоција е закажана на 13 јули.
